عزوزة ڨرنبّو… ڨالت نحبّو…فاقت مالسّكرة ڨالت نسبّو

ولينا معروفين بالتحيل، قلة المعروف فالخارج و الا على الانترنت، و اطلقوا علينا اسم خاص بالتوانسة الي هو Rats, يعني حاشاكم فيران، جرابع.

الموقع هذا فيه تصاور متع توانسة، تصاور عايلاتهم، اصحابهم، بنات و اولاد، باسبور، بطاقة تعريف، تصاور اولاد صغار ماعندهم حتى ذنب فلي عملوه والديهم (سواء صحيح و الا غالط، تو نجيوه الموضوع هذا), تصاور توانسة يخدمو فالامن، حرس، جيش…الخ…

يقول القايل اي ميسالش خليهم يفضحوا، نقلك لا خاطر فمة نوعين متع تشهير :

النوع الاول متع التشهير هو التشهير الايجابي الي يلزم يكون الهدف متاعو باش تصلح و توعي الناس و خاصة يكون بالادلة.

النوع الثاني الي هو اخطر، التشهير المبني على الكره و الحقد و الهدف متاعو بث العنصرية تجاه كل ماهو تونسي.

الموقع هذا كيف ما قلت الظاهر هو التشهير بالتوانسة و تقديم الدعم المعنوي للضحايا (اي يسميوا رواحهم ضحايا ) لكن المهمة متاعو الاساسية هي مزيد كره التوانسة.

فيه 4 انواع متع نساء (الاغلبية متاعو نساء كبار).

النوع الاول هو النساء اي يحبوا يعرفوا العادات و التقاليد متع التوانسة، نسبة نجاح العلاقات معاهم، و يحبوا يعرفوا تونس… و هنا يجي دور المشرفين عالموقع و الاعضاء…يقولولهم اخطاكم ، التوانسة الكل متحيلين، يحبوا عالفلوس و الفيزا الخ…

النوع الثاني هوما الي للاسف تعرضوا للتحيل، العنف، و الخيانة من طرف بعض التوانسة، و حبوا يحكيوا تجاربهم. (فمة زادة منهم الي وصلوا يكرهوا اي تونسي و يعملوا المستحيل باش يشوهوا صورة تونس).

النوع الثالث و هو الاخطر،تقريب 80% منهم، هوما النساء الي علاقتهم وفات مع التوانسة (سواء طلاق، صحبة وفات، علاقة بالانترنت ما مشاتش الخ…).

النساء هاذم مهمتهم فالانترنت، يبعثوا طلبات صداقة للتوانسة على بعضو ،فيسبوك، انستاغرام…تيكتوك….(بالطبيعة faux profils)

يحكيوا معاهم شوية، يطمعوا التوانسة بالفلوس، فيزا، ابعثلي و نبعثلك تصاور، فيديوات… اش يعملوا؟ يسجلوا كل شي، فيديو، كابتير و بعد يمشيوا للموقع الي حكيت عليه و يهبطولهم تصاورهم، المحادثات متاعهم، تصاور عايلاتهم و اصحابهم. كل شي.

النوع الرابع هوما المشرفين على الموقع هذا، يمشيوا بمنطق على و على اعدائي.

(وحدة منهم تسكن في تونس).

مايهمهمش الحكايات صحيحة و الا غالطة، اي واحد ينجم يهبط تصويرة متع اي تونسي يقبلوها، تلفون، فيسبوك متاعو عايلتوا…اي حاجة المهم تونسي خاطر يعرفوا الي التوانسة ما ينجموش يشكيوا من تونس عكس البرة).

حتى انت كتونسي تمشي للموقع متاعهم تسجل فيه (هوما زعمة زعمة يحبوا التوانسة خاطر يستحقوهم خاصة فالترجمة), مالاول مرحبا بيك الخ… و بعد كيف تفيق بالعنصرية و الحقد ساعات من غير سبب تجاه التوانسة، جرب احكي معاهم بالمعقول و فسرلهم…. تو بالوقت يبلوكيوك و يخرجوك).

على فكرة فمة زادة توانسة (بنات و اولاد) فالموقع هذاكة، توانسة سواء عن جهل (يصدقوا كل شي و يقراو صفحة ملي يتقال), و الا لحاسة، يلحسوا كل حد و نيتو، الي يحب يلحم وحدة، و الي تكره ولد بلادها الخ…

ينجم يكون خوك، صاحبك، ولد خالك، زميلك فالخدمة، (حتى فمة تصاور والدين بعض التوانسة)، من سوء حظو تم التشهير بيه من غير حتى دليل، من عند بعض النساء المرضى، و الا خاطر حصل مع وحدة غايتها التشهير بالتوانسة.

ميساجي لبعض التوانسة الي قاعدة تستسهل فالحكايات هذي، اعرفوا مع شكون تحكيوا خاصة عالانترنت، يزيوا مالتلهميق متع الفلوس، اذا نيتك صافية راهو ربي ما يكتبلك كان الخير، و اذا نيتك خايبة، توقع كل شي ينجم يصيرلك.

خليوا سمعة التونسي باهية.

ملاحظة : الموقع الي نحكي عليه هو بالانجليزية، الي باش يعمل فيه كونط يرد بالو، حط بريد الكتروني غالط، ماتحطش اسمك،، حط اسم غالط، ماتحطش تصويرتك، يعرفوك الي انت تونسي بالadresse IP متاعك.

شوفوا التصاور و الحكايات (فمة تصاور ما تنجمو تشوفوهم الي ما تعمل كونط و تبقى تستنى برشة باش يقبلوك خاصة اذا انت من تونس) بالكشي تعرفوش حد ما عيلتكم، اصحابكم و هوما ما فيبالهمش.

ناكدلكم الي 90% مالحكايات الي مهبطينهم غالطة و بعض التصاور الهدف متاعها الكره و الانتقام مالتوانسة.

وسع بالك و اقرا